Skessuhorn:

Eiríksstaðir tilnefndir til Eyrarrósarinnar

9. febrúar 2010

Eyrarrósin, sérstök viðurkenning fyrir framúrskarandi menningarverkefni á landsbyggðinni, verður afhent á Bessastöðum mánudaginn 15. febrúar klukkan 16. Þetta er í sjötta sinn sem viðurkenningin er veitt. Þrjú verkefni hafa verið tilnefnd úr hópi umsækjenda: Tónlistarhátíðin Bræðslan á Borgarfirði eystra, Eiríksstaðir í Haukadal og Skjaldborg heimildarmyndahátíð á Patreksfirði.   Verðlaunin veitir Dorrit Moussaieff forsetafrú, sem jafnframt er verndari Eyrarrósarinnar. Sá sem hlýtur Eyrarrósina í ár fær fjárstyrk að upphæð 1,5 milljón króna og verðlaunagrip eftir Steinunni Þórarinsdóttur til eignar. Hin verkefnin sem tilnefnd eru hljóta 200 þúsund króna framlag og forsvarsmenn verkefnanna allra fá að auki flugferðir frá Flugfélagi Íslands. Á síðasta ári kom Eyrarrósin í hlut Landnámssetursins í Borganesi og Eyrbyggja - Sögumiðstöðin í Grundarfirði var auk þess tilnefnd til verðlaunanna.